Mesfushori i Mançester Junajtedit, Pol Skols ka thënë se nuk dyshon në aftësinë dhe mundësitë e skuadrës së tij për të shënuar fitore në ndeshjen e kthimit në Porto, në kuadër të çerekfinales së Ligës së Kampionëve. "Djajtë e kuq" nuk arritën të krijojnë epërsi në ndeshjen e parë para tifozëve të vet, duke e mbyllur takimin me rezultat 2:2.
Djelmoshat e Fergusonit janë të vetëdijshëm se në stadiumin e Portos nuk ka fituar asnjë skuadër angleze, por Skols megjithatë mendon se skuadra e tij mund t'ia dalë mbanë. "Ajo që na duhet në Porto është fitorja. Me futbollistët që kemi, jam i sigurt se mund t'ia arrijmë këtij qëllimi", ka thënë Skols. Mançester Junajtedi gjatë fundjavës në Ligën Premiere shënoi fitore ndaj Sanderlendit, me rezultat 2:1, kurse njëri nga golashënuesit ishte Skols, derisa golin e dytë e realizoi i riu italian, Federiko Makeda. "Ai shënoi gol pas kontaktit të parë ose të dytë me topin dhe duket si një golgeter i shkëlqyeshëm. Është i ri, por jam i sigurt se ai do të qëndroj me këmbë në tokë", ka pohuar Skols për golin e dytë të italianit Makeda në fanellën e "djajve të kuq". Ndeshja e kthimit, Porto - Mançester Junajted do të zhvillohet të mërkurën