Sulmuesit rus të Totenhemit, Roman Pavluçenko do t'i duhet të shfrytëzojë pushimin veror për të mësuar gjuhën angleze, nëse synon seriozisht për të fituar vendin e titullarit në skuadër. Një gjë të tillë e thotë trajneri i Totenhemit, Hari Rednap. Futbollisti rus të shtunën i solli fitoren skuadrës së tij ndaj Uest Hemit, ndeshje në të cilën ai hyri si zëvendësues.
Ndonëse në Londër erdhi para shtatë muajsh, ai ende ka problem me komunikim. Roman Pavluçenko mezi flet anglishten, kurse në stërvitje vjen me përkthyes, në mënyrë që t'i kuptojë këshillat e trajnerit Rednap. Me këtë rast nuk mungojnë as momentet komike, të cilat i zbulon vetë trajneri i Totenhemit. "Ky është një problem jo i vogël. Gjithmonë kemi përkthyesin e tij i cili sillet përreth futbollistëve. Kur topi shkon në drejtim të Romanit, ai menjëherë vrapon në drejtim të tij. Non-stop është përkrah tij, madje di edhe të shkëputet mirë dhe të shënojë gol me kokë", ka thënë Rednap, duke aluduar në përkthyesin e Pavluçenkos: "Mendoj se Romani do të ishte sulmues edhe më i mirë, nëse do të fliste anglishten ashtu si duhet", ka shtuar Rednap, i cili ish-sulmuesin e Spartakut të Moskës kryesisht e mbanë në bankinë. Do theksuar se Totenhemi, që pati startin më të dobët në histori të klubit në këtë edicion, tashmë është vetëm dy pikë larg zonës që e çon në garat evropiane, prandaj Rednap dëshiron të nxjerrë maksimumin nga lojtari i tij, i cili erdhi në këtë skuadër për 13 milionë funte.